(1954) El Ruegu
Metia 'ntre dos montes, tapá per l'arbolada, tá la capilla'l Cristu, la capillina guapa, bálsamu pa dolores y d'ansies esperanza, onde la xente acude
a llenar de bonancia
los cuerpos con Ilaceries y les penes del alma.
Si dalgunu la mira cuando to'lgo lexana, que'l güeyu non cullumbra más que una cosa mansa, antóxase tar viendo un neru de raitana, onde la raitanina
mientres los güevos caldia, escucla per si algunu quier asistiar so casa.
Viniendo pel atayu, tou fechu de pisada, camin de munchu usu pa non dar la rodiada, allega una vieyina cuando ascomienza'l alba, con los pasinos floxos que apoya na cachaba y el oyiu bien atentu pa que noi pase nada.
Los años vense claros
como'n clara alborada, en el peyeyu duru
de so frente arrugada.
Son munchos los inviernos
que azotaren so cara,
y munchos los veranos que'l sol fechu de brasa, pasandoi per los gueyos dexóla en sin mirada.
Allega la cieguina a la imaxen sagrada. Al palpu busca'l suelu y ponse arrodillada. Presinase'n silenciu,
la frente allevantada, y de sos llabios secos sal triste una plegaria
que diz homilde y suave
con la cara inclinada.
-¡Siñor! Tú que yes güenu atiendi mio rogada.
En ti busco consuelu
pos toy acongoxada. Mio pidiu ya lu sabes. Pa min non quiero nada. Pero falta tan pocu pa que contigo vaiga, que non quisiera dime asi, tan esmolguiada.
Solo algamar quisiera de to divina gracia, que la salú non dexe al nietin de mio alma y la suerte lu lleve
onde ella apigaza. Qu'n dia foise lexos a tierres de oru y plata, xurando golver ricu
o murir si frascasa.
Y failu que comprenda que ye mio mayor ansia murir con allegría,
murir en to paz santa, si me diz que tá sanu,
si me escribe una carta. ¡Siñor! Cumpli esti ruegu que me quita la calma. Non dexes de to mano
al nietin de mio alma.